Sámi NissonForum

 SNF-Sámi NissonForum sávvá Sámi Girječálliid Searvái lihku 30 jagi ávvudemiin ja doaluin mat leat Kárášjogas boahtte vahkkoloahpa. Seammás lea šállosahtti ahte Sámedikki áššemeannudeapmi ja doarjjajuolludeamit sámi dáiddasurggiid dáfus guhkin eret leat duhtadahtti. Mii čujuhat SNFa guovtti  jahkečoahkkinmearrádussii sámi dáidaga hárrái. 

Govva: SNF-Sámi NissonForum seminára golggotmánu 3.b. 2009 Romssas ”Sámenissonat girjjálašvuođas ja sámi oskkus” čohkkii olles 40 olbmo  SNF Romssa jahkečoahkkin gáibida lasi ruđa sámi čáppagirjjálašvuhtii.  Semináras ledje ee. SNFa stivralahttu Annele Gaup (gurut b.), Guovdageaidnu, Kjellaug Hauan, Romsa, ja sudno duohkin áicat Alla Vasiljeva, Kristin Solberg ja Anitta Suikkari.

Loga eanet Eanet doarjaga sámi čáppagirjjálašvuhtii

SNF-Sámi NissonForum lea sádden breva ja ohcamuša Norgga Sámediggái ruhtadit sámenissoniid vástesaš čállingotti ja organisašuvnna doaimma.  Ohcan sáddejuvvo maiddái Ruoŧa ja Suoma Sámediggái lagamus áiggis.
Nu SNF-Sámi NissonForum lea ođđajagi rájes maiddái njealji riikka sámenissoniid čállingoddi, iige dušše organisašuvdna. Čállingoddi mii doaibmá resursa- ja dokumentašunguovddážin sámi nissonkultuvrra ja –gelbbbolašvuođa várás. 

Loga eanet SNF sihke čállingoddi ja organisašuvdna

SNF lágida seminára “sáhkalaga:dialog” Oslos bearjadaga juovlamánu 4.b. di. 12-17. Fáddán lea: Eamiálbmotnissonat Davviriikkain ja Davvioarje-Ruoššas – veahkaváldi,  jugešvuohta ja illasteamit.
Semináras ovdanbuktit mis guovtti prošeavtta, mainna SNF lea bargagoahtán jagis 2009,  ja bovdet eiseválddiid, ásahusaid ja organisašuvnnaid boahtit sáhkalaga ja ovttasbargui. Váldde oktavuođa maŋimustá vuosárgga skábmamánu 23.b. jos dáhtot searvat. snf@trollnet.no  Muital namat, e-poastačujuhusa ja gean don ovddastat. Oassálastin lea nuvttá. 

Loga eanet SNF seminára “sáhkalaga:dialog” Oslos juovlamánu 04.b. 2009

Jagi áigi čálii SNF breva Sámi eiseválddiide ávžžuhit bargat jugešvuođa vuostá sámi servodagain. SNF ii ožžon coavcci dán bargui, muhto bargu lei nu dehálaš ahte eat sáhttán diktit orrut. SNF mearridii de ohcat ruđa Davviriikkaid Ministtarráđi Árktalaš Ovttasbargoprográmmas, Norgga Sámedikkis ja Norgga Barentsčállingottis, ja lea sis ožžon lohpádussan 575 000 nkr ruhtadoarjjan 2009-2011. De lea SNF ovttas RAIPON:ain ja eará ovttasbargoguimmiiguin  beassan bargagoahtit doaibmaplána Jugesvuođa ja veahkaválddi vuostá ja “Oahppat eallit alkohola haga” prošeavttain.

Breva skábmamánu 11.b. 2008:

SNF BIVDÁ SÁMEDIKKIID JA SÁMIRÁĐI VÁIKKUHIT DASA AHTE RÁHKADUVVO DOAIBMAPLÁNA kJUGEŠVUOĐA JA VEAHKAVÁLDDI VUOSTÁ MAID BEARAŠ GILLÁ SÁMI SERVODAGAIN

Loga eanet Jugešvuođa vuostá bargagoahtán skábmamánus 2008

Biret-Elle Láilá, Laila Somby Sandvik, lea riegádan 1942 ja ássá Kárášjogas. Láilá lea leamaš almmolaččat oidnosis dakkár oktavuođain gos árbevirolaččat eai leat oidnon galle nissonolbmo, ja nu son leamaš ja lea ain ovdagovvan máŋgasiidda. Sus lea sámepolitihkalaš barggustis leamaš garra dáhttu buoredit sámi mánáid ja nissonolbmuid dili, ja nu ámmáhisbarginge. Láillá luottaid ja bargguid sáhttit guorrat sámi servodateallimis – ja SNF lea ilus go son ain lea duvddan sámi servodatovdáneamis, máhtuinis, gealbbuinis, bargomovttainis ja eandalit návccaidisguin.

Loga eanet Biret-Elle Láilá oaččui SNF ovdánahttinbálkkašumi 2009

Norgga Fafo-nammasaš vuođđudusa dutkit leat raporttas Lesbiske og homofile i Sápmi jearahallan gávcci olbmo, ja čájehan mo sohkabealrollat, soga báttit, osku, árbevierut, vealaheapmi ja ovdagáttut váddudit oainnusin dahkat iežas lesba dahje homofiilla sápmelažžan. Loga eanet dás (dárogiel teaksta) raportta birra:  http://www.fafo.no/

SNF-Sámi NissonForum sávvá Norgga ođđa sámediggái lihku. SNF illuda go Sámedikki 39 lahtuin leat 19 nissonolbmo ja illuda maid sámediggeráđi nana nissonovddasteamis. SNF dattetge ferte čujuhit ahte dál livččii dárbu duvdit sámi servodaga nissonpolitihkalaš áššiid almmolašvuhtii. 

SNF jahkečoahkkin, gieskat čoahkkanan Romsii golggotmánu 2.-4.b. 2009, sakka šálloša ahte nissonpolitihkalaš bargu dál orru bázahallon. SNF atná dán lávkin maŋosguvlui sohkabealdásseárvobarggus, das go SNF bargu loktet sámenissoniid árvvu ja demokráhtalaš vuoigatvuođaid seamma dássái go davviriikkaid nissoniin muđui, ii leat eiseválddiid guovdo ožžon coavcci. SNF bivdá norgga ođđa sámedikki dán váldit duođasin ja lagamus áiggis lágidit nissonpolitihkalaš konferánssa. SNF stivra govas - gurut b. Valentina Sovkina, Gudrun E Eriksen Lindi (duogábealde), Annele Gaup ja May-Lisbeth Myrhaug. Rauna Kuokkanen lea maiddái SNF stivrras lahttun. 

Loga eanet - Ávžžuhus Sámediggái lágidit nissonpolitihkalaš konferánssa

Norgga oaivegávpogis Oslos lei gieskat konferánsa “The Economic Rights of the Girl Child” (nieidamáná ekonomalaš vuoigatvuođat). Máilmmidásis lea nu ahte nieiddat gaskal 15 ja 19 jagi gillájit 50% visot seksuálalaš illastemiin, 70% máilmmi 1.5 miljárdda olbmos geat ellet vuolil 1- ovtta - dollaris beaivái leat nissonolbmot, lulábealde Sahara Afrihkás: 2/3 oassi nuorain gaskal 15 ja 19 jagi geasa gieskat lea njommon hiv/aids, leat nieiddat.

Visot dát dieđut leat statistihkalaččat duođaštuvvon, ja dán berrešii oažžut ovdan ja hállat solidaritehtas ja das maid juohkehaš mis sáhtášii dahkat. Ii dušše Internašunála nissonolbmuid beaivve njukčamánu 8.b., muhto goas beare;  ruovttus,  ohppiide, studeanttaide, bargoskihpáriidda, servviide, ja eandalit politihkáriidda. Dákkár girji gávdno, maid nuvttá oažžu: “Because I am a Girl” (2007).  Loga eanet http://www.care.no/

 Amma leat donge ruhtačoaggin sotnabeaivve golggotmanu 18.beaivve ?

Romssa gávpogis lávvardaga 03.10.09: Ánddáid Ánne (govas) muitala SNF semináras “Sámenissonat girjjálašvuođas ja oskkus”, Elsa Laula Renberg ja Karin Stenberg birra girječállin. Soai leigga ideologat ja vuosttas girječálli sámenissoniid gaskkas.

Soai bijaiga vuođu sámepolitihka ákkastallamii, ja otná sámedikkiin Suomas, Ruoŧas ja Norggas, gullat seamma ákkastallamiid go dalle - 100 jagi dassái. Velá feministtain ja girječálliin Virginia Woolf:ain sáhttá sudno buohtastahttit. Ánddáid Ánne (Anne Wuolab) lea journalista ja čálli ja orru Ruoŧa bealde Likšus.

Romssa gávpogis: Lávvardaga 03.10. 2009 boađát gullat ja oassálastit sámenissoniid máŋggabealat kulturárbbis.
Ee. muitala oahpaheaddji ja girječálli Iŋgos-Máhte Iŋgá (govas) mo sámi eamiosku lea sutnje divrras gáldun. 

SNF-Sámi NissonForum seminára “Sámenissonat girjjálášvuođas ja sámi oskkus”,  di. 10- 18, Rica Grand Nordic Hotel, Romssas, leat rabas doalut, davvisáme-, dáro- ja ruoššagillii (simultánadulkon). Várre fal saji, sáddes e-poastta duorastahkii 01.10.09: snf@trollnet.no

Prográmma: Loga eanet Loga eanet Sámenissoniid kulturárbi