ON komitea nissoniid vealaheami vuostá ja sámenissoniid dilli
Yle Sámeradio 15.7.08 ođđasat:
ON komitea nissoniid vealaheami vuostá čoahkkanii gullat Suoma – ovdan bođii maid sápmelaš nissoniid dilli
Unnitlohkoálbmoga nissoniid dilis ja máŋggageardánis vealaheamis lei sáhka New Yorkis, go Ovttastuvvon Našuvnnaid komitea nissoniid vealaheami vuostá čoahkkanii gullat Suoma dili mannán vahkkus. Okta komitea lahttuin evttohii maid, ahte Suomas ráhkaduvvošii doaibmaprográmma sápmelaš nissoniid sajádaga ovddideami várás.
ON komitea gieđahalai čoahkkimis maid nissoniidda čuohcci veahkaválddi Suomas sihke nissoniid meari alimus virggiin.Komitea nissoniid vealaheami vuostá gieđahallá aiddo soahpamušriikkaid mearreáigásaš raporttaid, maid dat addet oktasas soahpamušas. Soahpamuša ulbmilin lea jávkadit buot vealaheami nissoniid vuostá.
Oktasaš soahpamuša leat ratifiseren 185 riikka. Suomas dat bođii fápmui jagis 1986.
Gáldu YLE