SNF-Sámi NissonForuma breva Norgga, Ruoŧa ja Suoma Sámediggái ja Sámiráđđái 11.11.2008

 

SNF BIVDÁ SÁMEDIKKIID JA SÁMIRÁĐI VÁIKKUHIT DASA AHTE RÁHKADUVVO DOAIBMA-PLÁNA JUGEŠVUOĐA JA VEAHKAVÁLDDI VUOSTÁ MAID BEARAŠ GILLÁ SÁMI SERVODAGAIN

 

Čujuhat SNF-Sámi NissonForuma Roavvenjárgga jahkečoahkkincealkámuššii skábmamánu 1. -2.b. 2008.

SNF bivdá ahte din orgána doarjjošii SNF dás ahte lea dárbbašlaš bargat doaibmaplána ovdii jugešvuođa ja veahkaválddi vuostá maid bearaš gillá sámi servodagain.

SNF bivdá ahte ášši biddjo din áššelistui, nu ahte doaibmaplánabarggu sáhttá álggahit nu johtilit go vejolaš. 

SNF diehtá ahte sámenissonat ja olleš bearrašat gillájit jugešvuođa dihtii, muhto SNFas eai leat resurssat ja bargonávccat álggahišgoahtit ja lágidišgoahtit dákkár viiddis barggu, das go mis ii leat čállingoddi ii ge oktage fásta bargi. 

SNF oaivvilda ahte barggu ferte lágidit muhtun ásahusa olis dego máŋggajagáš prošeaktan, sierra prošeaktajođiheaddjiin ja prošeaktastivrrain, ja bargu ferte ruhtaduvvot davviriikkalaš ruđain, nu ahte prošeakta sáhttá fátmmastit olles sámi álbmoga njealji riikkas. Bargu ferte čatnašuvvot sámi gealbobirrassiida dán suorggis ja ferte maid čatnat dan sámi báikegottiide ja sámi birrasiidda.

Dearvvuođaiguin

May-Lisbeth Myrhaug   stivralahttu  (v.č.)  

Gudrun E E Lindi      stivralahttu (v.č.)

 

  

SNF stivralahttu Gudrun E E Lindi ja ruošša eamiálbmotlihtu RAIPON stivralahttu Larisa Abryutina, Sámekonferánssas Roavvenjárggas golggotmánu loahpas. Go muitaluvvui RAIPON prošeavttas “Oahppat eallit alkohola haga” SNF-semináras Roavvenjárggas, dovddahuvvui dárbu duođasin váldit jugešvuođa ja veahkaválddi maid bearaš gillá olles Sámis, ii dušše Ruošša bealde. Ja nu jurdda Doaibmaplána-barggu oažžut áigái. Govven: Alexander Kobelev 

RAIPON birra: www.raipon.org