Doaibmaplána vuostálastit jugešvuođa ja veahkaválddi maid bearaš gillá
SNF jahkečoahkkincealkámuš nr. 4:
Nissonolbmot čoagganan SNF-Sámi NissonForuma jahkečoahkkimii oaivvildit ahte lea dárbu álggahit bargat doaibmaplána vuostálastit buotlágan jugešvuođa ja veahkaválddi maid bearaš gillá sámi servodagain. Eaktun lea ahte dasa juolluduvvo davviriikkalaš ruhta, vai doaibmaplána fátmmasta olles sámi álbmoga buot njealji riikkain. Bargu ferte čatnašuvvot gelbbolaš fágabirrasiidda ja sámi báikegottiide. SNF áigu bargat dan ovdii ahte plánabargu álggahuvvo 2009:s ja gárvana 2010:s.
Seammás SNF atná buorrin dan maid ruošša RAIPON eamiálbmotorganisašuvdna lea oččodeamen áigái; prošeakta ”Oahppat eallit alkohola haga”, mii galgá eastadit jugešvuođa Davvioarje-Ruošša eamiálbmotservodagain. SNF mielas lea lunddolaš ahte prošeakta lea oassin doaibmaplánas. RAIPON stivralahttu, dr. Larisa Abryutina, buvttii ovdan prošeavtta SNFa ”Sielu ráfi”-semináras Roavvenjárggas 31.10.-01.11.2008. SNF mearridii ovttasbargat prošeavttas, mii galgá álggahuvvot pilotprošeaktan golmma báikkis Davvioarje-Ruoššas, okta dain lea sámi gilli Lujávri.
Doavttir Larisa Abryutina gullá čukči-álbmogii Sibirijas ja lea RAIPON- Ruošša eamiálbmotlihttu stivralahttu, man váldokantuvra lea Moskvas. SNFa semináras “Sielu ráfi” Roavvenjárggas son buvttii ovdan prošeavtta ”Oahppat eallit alkohola haga”, maid RAIPON lea vuolggahan, ja mii plánejuvvo álggahuvvot golmma báikkis Davvioarje-Ruoššas. Olgeš bealde SNF stivralahttu ja Guolásat-ossodaga jođiheaddji Valentina Sovkina, Lujávri.