Roavvenjárgga-cealkámuša doahpagat ”nissonolbmot ja vuoras olbmot”
SNF jahkečoahkkincealkámuš nr. 6:
SNF-Sámi NissonForuma jahkečoahkkin imašta Roavvenjárgga-cealkámuša ovtta doahpaga, maid Sámekonferánsa gieskat mearridii Roavvenjárggas, mii čuodjá ná:
”Deattuha vel nissoniid ja boarrásiid dehálaš saji sámi kultuvrralaš bargguid ja máhtu hálddašeaddjin ja oahpaheaddjin.”
SNF imašta doahpaga ”nissonolbmot ja vuoras olbmot” – eandalit ahte dát leat ovttastuvvon dego dat livčče leat ovttaárvosaš doahpagat, vaikko nubbi muitala sohkabeali birra ja nubbi fas muitala agi birra ja danne lea vuoras olbmuid birra oppalaččat.
Nubbi maid SNF fuomášuhttá dás lea ahte sámi njunušpolitihkáriid čoahkkincealkámušat oppalaččat hábmejuvvojit dego albmáin ii leat sohkabeali, nappo de lea dušše nissonolbmuin. SNF mielas dát duođašta ahte sihke Sámiráđis ja Sámi Parlamentáralaš Ráđis lea dárbu ođasmahttit máhttu sohkabeali birra dego servodatkategoriijan.
Das go sámenissoniid erenoamážit gesset ovdan kulturárbbi guoddin, de bivdá SNF Sámiráđi ja sámedikkiid láhčit dili vai sámi albmát besset leat aktiivvalabbon doalvut sámi kulturárbbi ovddosguvlui.
Sámi Nisson Foruma stivralahtut May-Lisbeth Myrhaug, Ellacarin Blind ja Valentina Sovkina čohkkájit ja gullet Rauni Magga Lukkari lohkamin divttaid SNF jahkečoahkkima rabadettiin Roavvenjárggas skábmamánu 1.b. 2008.