Sámi Parlamentáralaš Ráđi dásseárvobargu ja dásseárvobálkkašupmi
SNF-Sámi NissonForum oaivvilda ahte Sámi Parlamentáralaš Ráđđi (SPR) berrešii bargagoahtit duddjot sierra doaibmaplána sohkabealdásseárvvu ovdii, mii gusto njealji riikkas. SPR dálá Doaibmaplána, mearriduvvon 2006, č. 2.9 Dásseárvu, cealká ee.
“Vai dásseárvobargu oažžu nannoset vuođu, áigu SPR álggahit viidáset ovttasbarggu daiguin, geat barget dásseárvvuin sámi servodagas.”
SNF ohcala barggu SPR beales doaimmahit duohtan dán áigumuša ja leat vuordagasas beassat mielde dán bargui.
SPRa Dásseárvobálkkašupmi
SNF mielas lea hirbmat buorre ahte sámedikkit ovttasráđiid leat juohkimin SPRa dásseárvobálkkašumi.Vuosttas geardde lei jagis 2007, dalle geigejuvvui bálkkašupmi Risten Rauna Maggai. Dattege oaivvilda SNF ahte lea menddo hárve geiget dákkár bálkkašumi dušše juohke viđát jagi. Dan galggašii dávjjit, mahkáš juohke goalmmát jagi. Dát movttidahttášii eanebuččaid áŋggirdit dásseárvvu ovdii sámi servodagas, ja dán atnet SNF, ja áigumušaid mielde maiddái sámedikkit, dárbbašlažžan.
Dasa lassin SNF oavvilda ahte SPRa dásseárvobálkkašumi geigen galggašii leat stuorra ja hearvás dilálašvuohtan gosa sihke álbmot ja media bovdejuvvo. Dat berre de gulahuvvot buori áiggis ovddalgihtii. Dát ge livččii mielde addimin dássárvobargui dan stáhtusa ja saji maid berre oažžut sámi servodagas.