Buresboahtin Sámi NissonForum siidui!

Dát leat SNF-Sámi NissonForuma ođđa ruovttusiiddut mat leat áin barggu vuolde. Siidduid váldogiella lea davvisámegiella, muhto vehážiid mielde bohtet dieđut maiddái dáro-, ruošša- ja eaŋgalsgillii. Dál vuos leat sámegiel- ja dárogielsiiddut doaimmas. Gulahala áinnas minguin e-poastta bokte: snf@trollnet.no

SNF ovdánahttinbálkkašupmi 2008 nuortasápmelažžii Tiina Sanila-Aikio

 SNF lea geigen dán jagáš ovdánahttinbálkkašumi juridihka-studentii, musihkkárii ja boazosápmelažžii Tiina Sanila-Aikio (govas). Tiina lea 25 jahkásaš Čeavetjávrri nuortasápmelaš Suoma bealde, ja bajásšattai bearrašis geat barget boazodoalloturismmain.  Ieš lea Tiina náitalan Anára boazosápmelaččain. Eanemus dovddus lea Tiina ‘máilmmi áidna nuortalaš nissonrockamusihkkarin’.

Bálkkašupmi geigejuvvui Roavvenjárggas SNFa ”Sielu ráfi” seminára rahpamis, Cumulus hoteallas, bearjadaga golggotmánu 31.b. 2008.  Tiina Sanila-Aikio anii bálkkašumi stuorra gudnin ja rohttestii leudda giitosin.

Tiina Sanila Band čuojahii Sámekonferánssa doaluin eahkeda ovdal, ja sihke sámedikkiid ja Sámiráđi politihkáriin, boahtán oppa Sámis, fiškašedje ja fáškašedje gáktehealmmit:

 

Tiina lohká juridihka Lappi universitehtas Roavvenjárggas. Son lea politihkain bargán Suoma Sámi Nuoraid Searvvis ja Njávdáma Nuortalašeráđis. Tiina lea dál suoma Sámedikki kulturlávdegotti lahttu. Son lei velá Saa’mi Nue’tt ry, nuortalaš kultursearvi mii vuođđuduvvui skábmamánu 2006, vuosttas jođiheaddji. Dál Pauliina Feodoroff jođiha dan.

Son hálddaša sihke nuorta- ja davvisámegiela, čállá ja lávlu guktui gillii ja maiddái eaŋgalsgillii. Son lea ilbmadan guokte skearru ja ovtta siŋle,  ja lea johtán iežas Tiina Sanila Band:ain sihke Sámis ja olggobeal Sámi. Nuortasámi leudda (luohti) ge gullo go Tiina lea lávddis.

SNF atná goarggus Tiina Sanila-Aikio danne go son lea árjjalaš ja gievrras nuortasápmelaš nissonolmmoš. Su karriearageaidnu čájeha máŋggabealatvuođa, mii lea sihke árbevirolaš ja ođasmahtti, ja nu son čeahpet ja čielgasit ovddasta ođđaáigge sámi identitehta ja girjáivuođa.

SNFa ovdánahttinbálkkašupmi lea symbolalaš; 1000 nkr ruhtasupmi ja diploma, maid SNF lea geigen 1999 rájes sutnje gii dahje sidjiide geat leat ovddidan dásseárvvu ja ovttaárvosašvuođa.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>