Sotnabeaivve juovlamánu 14.b. 2008 lágiduvvui vuosttas ruošša sámiid oktasaš konfereansa Boazováris Guoládagas. Konfereanssa deháleamos áššin lei sámedikki ásaheapmi Guoládahkii.

Guoládaga sámit álggahedje 1980-logus smiehttat mo sii sáhtašedje suodjalit iežaset kultuvrra, giela ja árbevirolaš ealáhusaid, ja ahte mo oaččošedje sámiid jiena gullot. Dan rájes leat sámiid organisašuvnnat ruošša bealde plánen sámedikki ásaheami Guoládahkii ja leat dán bargui bivdán maiddái eiseválddiin veahki.

Norgga Sámedikki presideanta Egil Olli muittuha man olu Sámediggi lea Norggas buoridan eiseválddiid ja sámiid gaskavuođaid. Su mielde davviriikkalaš sámedikkit galggašedje ge dál fállat doarjaga sámedikki ásaheapmái Ruošša bealde. Murmánskka fylkka stáhtalaš eamiálbmotguovddáš ja SNF-SámiNisson Forum leat dán jo dahkan.
(Gáldu: Yle Sámi Radio interneahttasiidu 15.12.2008)