Sotnabeaivve juovlamánu 14.b. lágiduvvo stuorra sámekongreassa Boazováris Guoládagas, man deháleamos áššin lea sámi parlameantta ásahepmi Guoládahkii.  SNF doarju dán ásaheami.

Loga dás barggu birra ruošša bealde (ruoŧagillii)

Ruošša beale sámiid ovddasteaddjit čilgejedje Sámedikki dievasčoahkkimis 24.11.2008 sámeparlameantta plánenbarggu birra. Dá leat Nina Afanasjeva, Valentina Sovkina, Elena Koroleva ja sámediggepresideanta Egil Olli Sámedikkis Kárášjogas.

SNF jahkečoahkkincealkámuš nr. 7 Roavvenjárgga jahkečoahkkimis 01.-02.11.08: 

SNF-Sámi NissonForum jahkečoahkkin doarju barggu ásahit sámi parlameantta ruošša beallái. Dát lea dehálaš bargun nanosmahttit sámiid oktavuođaid sihke ruošša bealde ja oppa Sámis. Bargojoavku lea duddjon láhkaevttohusa ja čielggadeami, ja joavkkus leat leamaš lahtut guktot Guoládaga sámiid váldoorganisašuvnnain OOSMO ja Guoládaga Sámi Searvi. Bargojoavkku lea jođihan Valentina Sovkina, guhte maiddái lea SNF stivralahttu ja lassin Barentsguovllu Eamilábmogiid Bargojoavkku (WGIP) lahttu. 

Dán barggu lea dorjon Murmánskka fylkka stáhtalaš eamiálbmotguovddáš, mii nammadii bargojoavkku cuoŋománu 7.b. dán jagi. Bargu bukto Norgga Sámedikkis ovdan Kárášjogas dán mánus, ja dasto stuorra sámi čoaggáneamis Murmánskkas juovlamánu 14.b., muitala Valentina Sovkina, guhte bovde buot sámiid váldit oasi dán historjjalaš kongreassas Murmánskkas.

SNF-Sámi NissonForuma lahtut Ruošša bealde sávvet buresboahtima stuorra sámekongressii Boazovárrái juovlamánu 14.b, masa ee. sámediggepresideanta Egil Olli searvá. Vilges gávttiin čohkká SNF stivralahttu Valentina Sovkina, guhte lea jođihan sámeparlameantta bargojoavkku.