Jagi áigi čálii SNF breva Sámi eiseválddiide ávžžuhit bargat jugešvuođa vuostá sámi servodagain. SNF ii ožžon coavcci dán bargui, muhto bargu lei nu dehálaš ahte eat sáhttán diktit orrut. SNF mearridii de ohcat ruđa Davviriikkaid Ministtarráđi Árktalaš Ovttasbargoprográmmas, Norgga Sámedikkis ja Norgga Barentsčállingottis, ja lea sis ožžon lohpádussan 575 000 nkr ruhtadoarjjan 2009-2011. De lea SNF ovttas RAIPON:ain ja eará ovttasbargoguimmiiguin  beassan bargagoahtit doaibmaplána Jugesvuođa ja veahkaválddi vuostá ja “Oahppat eallit alkohola haga” prošeavttain.

Breva skábmamánu 11.b. 2008:

SNF BIVDÁ SÁMEDIKKIID JA SÁMIRÁĐI VÁIKKUHIT DASA AHTE RÁHKADUVVO DOAIBMAPLÁNA kJUGEŠVUOĐA JA VEAHKAVÁLDDI VUOSTÁ MAID BEARAŠ GILLÁ SÁMI SERVODAGAIN

Čujuhat SNF-Sámi NissonForuma Roavvenjárgga jahkečoahkkincealkámuššii skábmamánu 1. -2.b. 2008.

SNF bivdá ahte din orgána doarjjošii SNF dás ahte lea dárbbašlaš bargat doaibmaplána ovdii jugešvuođa ja veahkaválddi vuostá maid bearaš gillá sámi servodagain.

SNF bivdá ahte ášši biddjo din áššelistui, nu ahte doaibmaplánabarggu sáhttá álggahit nu johtilit go vejolaš. 

SNF diehtá ahte sámenissonat ja olleš bearrašat gillájit jugešvuođa dihtii, muhto SNFas eai leat resurssat ja bargonávccat álggahišgoahtit ja lágidišgoahtit dákkár viiddis barggu, das go mis ii leat čállingoddi ii ge oktage fásta bargi. 

SNF oaivvilda ahte barggu ferte lágidit muhtun ásahusa olis dego máŋggajagáš prošeaktan, sierra prošeaktajođiheaddjiin ja prošeaktastivrrain, ja bargu ferte ruhtaduvvot davviriikkalaš ruđain, nu ahte prošeakta sáhttá fátmmastit olles sámi álbmoga njealji riikkas. Bargu ferte čatnašuvvot sámi gealbobirrassiida dán suorggis ja ferte maid čatnat dan sámi báikegottiide ja sámi birrasiidda.
Dearvvuođaiguin

May-Lisbeth Myrhaug   stivralahttu  (v.č.) 

Gudrun E E Lindi      stivralahttu (v.č.)

PREASSADIEĐÁHUSAT – Skábmamánu 7.b. 2008
SNF, Pb 110, N-9735 Kárášjohka

Cealkámušat dohkkehuvvon SNFa jahkečoahkkimis skábmamánu 1.-2.b. 2008 Roavvenjárggas.

Cealkámuš nr. 4:
Doaibmaplána vuostálastit jugešvuođa ja veahkaválddi maid bearaš gillá.

Nissonolbmot čoagganan SNF-Sámi NissonForuma jahkečoahkkimii oaivvildit ahte lea dárbu álggahit bargat doaibmaplána vuostálastit buotlágan jugešvuođa ja veahkaválddi maid bearaš gillá sámi servodagain. Eaktun lea ahte dasa juolluduvvo davviriikkalaš ruhta, vai doaibmaplána fátmmasta olles sámi álbmoga buot njealji riikkain. Bargu ferte čatnašuvvot gelbbolaš fágabirrasiidda ja sámi báikegottiide. SNF áigu bargat dan ovdii ahte plánabargu álggahuvvo 2009:s ja gárvana 2010:s. 
Seammás SNF atná buorrin dan maid ruošša RAIPON eamiálbmotorganisašuvdna lea oččodeamen áigái;  prošeakta ”Oahppat eallit alkohola haga”, mii galgá eastadit jugešvuođa Davvioarje-Ruošša eamiálbmotservodagain.  SNF mielas lea lunddolaš ahte prošeakta lea oassin doaibmaplánas. RAIPON stivralahttu, dr. Larisa Abryutina, buvttii ovdan prošeavtta  SNFa ”Sielu ráfi”-semináras Roavvenjárggas 31.10.-01.11.2008.  SNF mearridii ovttasbargat prošeavttas, mii galgá álggahuvvot pilotprošeaktan  golmma báikkis Davvioarje-Ruoššas, okta dain lea sámi gilli Lujávri.