snf-st-holm-smSNF-Sámi NissonForum lea sádden breva ja ohcamuša Norgga Sámediggái ruhtadit sámenissoniid vástesaš čállingotti ja organisašuvnna doaimma.  Ohcan sáddejuvvo maiddái Ruoŧa ja Suoma Sámediggái lagamus áiggis.
Nu SNF-Sámi NissonForum lea ođđajagi rájes maiddái njealji riikka sámenissoniid čállingoddi, iige dušše organisašuvdna. Čállingoddi mii doaibmá resursa- ja dokumentašunguovddážin sámi nissonkultuvrra ja –gelbbbolašvuođa várás. 

Breva 15.11.200 mii čuovui ohcamuša:

Norgga sámediggeráđđi
 
SNF-Sámi NissonForum ohcá ruđa doaimmahit njealji riikka sámenissoniid čállingotti

 
SNF lea jahkečoahkkimisteamet golggotmánus 2009 mudden iežamet stáhtusa das leat dušše nissonorganisašuvdna, dasa ahte maiddái leat njealji riikka sámenissoniid vástesaš čállingoddin.
 
SNF ohcá dál 500 000 n.ru. Norgga Sámedikkis, jagi 2010 doaibmadoarjjan. Dán atnit govttolažžan, das go supmi lea seamma dásis go Sámedikki doaibmadoarjja omd. sámi giellaguovddážiidda. Olles bušeahtta lea 1.165.000 n.ru. Ohcat ruđa velá dáin nuppiin ruhtadangálduin: Suoma ja Ruoŧa sámedikkiin.

Lassin SNF bidjá iežamet ruđa, ee. dan maid árvvu mielde oažžut go ohcat buhtadusa Norgga “Lotteri- og stiftelsestilsynet”-nammasaš ásahusas, lassiárvodivatođastusa liigegoluid ovddas. SNF lea ožžon dakkár ruđa jagi 2005 rájes, muđui SNF árvideames livččii lean heaittihuvvon organisašuvdnan. 2003-2006 áigodagas SNF oaččui 69 000 n.ru. jahkái doaibmadoarjjan – dán Norgga Sámedikkis.  
 
Jagis 2009 lea doaibmadoarjja Sámedikkis lassánan 145 000 n.ruvdnui. Muhto dađisŧaga lasi hástalusaiguin doaimmasteamet riikkaidgaskasaš organisašuvdnan mii doaibmá njealji riikkas, SNF atná ahte ásahuvvon čállingotti ja bistevaš váldočállivirggi haga, mis ii sáhte leat duođalaš ja dohkálaš doaibmá mii dávista mihttomeriidasamet.
  
SNF bivdá Norgga, Ruoŧa ja Suoma sámedikkiid fuolahit ahte čállingoddi oažžu dan mađi ekonomalaš geađgejuolggi ahte dahká dan resursa- ja dokumentašunguovddážin sámi nissonkultuvrra ja –gelbbbolašvuođa várás. Lasi resursaiguin dat buvttášii min bargui lasi stáhtusa ja váikkuhanválddi sihke sámi, davviriikkalaš, ja riikkaidgaskasaš ja globála oktavuođaide. 

SNF velá oaidná dárbbu dasa ahte  mii sámi nissonorganisašuvdnan fertet oažžut vejolašvuođaid sihke ieža bargat ja oalgguhit earáid riikkaidgaskasaš solidaritehtabargui nuppiid eamiálbmotnissonolbmuid ektui, geat gillájit olmmošmeahttumis ja ilgadis eallindilálašvuođain.
 
Sávvat ahte Sámediggi oaidná buorrin dan ahte njealji riikka sámenissonat oažžut iežamet čállingotti, ja ahte Sámediggi doarju min ohcama.
 
Čujuhat dokumenttaide: Ohcamuš golmmain mildosiin (dárogillii)
 
  
Dearvvuođaiguin SNF stivra
 
May-Lisbeth Myrhaug, Gudrun Eriksen Lindi, Valentina Sovkina,  Annele Gaup

snf-st-holm

Govva: SNF lea juo álggaheami rájes 1998 searvadahttán iešguđet riikka sámenissoniid bargosis. SNF stivra, čoahkkanan Stockholbmii 2008 čavčča, válddii liibba lágidit deaivvadeami gávpotnissoniiguin. Govas, gurut beale čuoččat: Isabella Suorra, Anna Nilsson, Márge Päiviö ja Lena Stenberg, gasku SNF stivra: May-Lisbeth Myrhaug (maŋábealde), Ellacarin Blind, ja ovddabealde Gudrun E E Lindi ja Valentina Sovkina, dasto olgeš ravddas Elisabeth Allergren (čuoččat) ja Maj Britt Ôhman.