valentina-sovkina1

SNF sávvá olu lihkku Valentina Sovkinai (govas) maŋŋil dehálaš Murmánskka kongreassa, maid ruošša beale sámi oappát ja vieljat lágidedje sotnabeaivve juovlamánu 12.b. ! SNF stivralahttu Valentina Sovkina válljejuvvui Guoládaga Sámi Sobbara vuosttas njunušolmmožin. Guoládaga Sámi Sobbar lea gaskaboddosaš ovcci olbmo-orgána, mii galgá ráhkkanahttit ásahit sámi álbmotválljejuvvon orgána ruošša beallái.  Loga dás (dárogillii): http://nrk.no/kanal/nrk_sami_radio/1.7423430

Dat lea movttiidahtti ja mearkkašanveara ahte 100 jagi maŋŋil go vuosttas sámi nissonsearvi vuođđuduvvui norgga bealde, máddin Sámis, leat nissonolbmot vuot njunnošis huksemin sámiide demokratiija ja čearddalaš vuoigatvuođaid,  dál ges nuortaleamos Sámis; Ruošša bealde. SNF sávvá lihkku dáinna dehálaš bargguin! cealká SNF-Sámi NissonForum stivra.

SNF čujuha  min  jahkečoahkkincealkámuššii golggotmánu 15.-17. b. 2010 Stockholmmas:

DOARJJA GUOLÁDATSÁMIID DEMOKRATIIJAOVDÁNEAPMÁI
Vuosttas sámi kongreassa oktavuođas Murmánska guovllus, Boazováris  juovlamánus  2008, ceggejuvvui Murmánskka guovllu Sámi Ráđđi (SUPS).  SUPS bargá ásahit sámi parlameantta ruošša beallái. Dát leat dehálaš lávkkit nannet sámiid searvevuođa ja demokratiija.  Nubbi kongreassa plánejuvvo dollot juovlamánu 11.-12. b. 2010 Murmánskkas.

SNF 13.jahkečoahkkin čoahkis Stockholmmas golggotmánu 15.-17.b. 2010, ávžžuha garrasit sámi organisašuvnnaid ja ásahusaid čájehit solidaritehta ja doarjaga sámi álbmogii Ruoššas, sin barggu ektui gievrudit sámiid demokratiija ja vuoigatvuođaid eamiálbmogin.  SNF ávžžuha ahte lágiduvvo nu, ahte nu olusat go vejolaš sáhttet oassálastit kongreassas. –Dat lea dehálaš ahte dii, sámi oappát ja vieljat, lehpet doppe oaidnit, ja nu mii sáhttit čájehit ahte mii leat ovttastahttojuvvon álbmot, cealká SNF stivralahttu Valentina Sovkina, guhte maiddái lea SUPS jođiheaddjin. Erenoamážit ávžžuha SNF Gáldu – Eamiálbmotvuoigatvuođaid gealboguovddáža  Guovdageainnus, čohkket ovttasbargui vai joksat norgga, ruoŧa ja suoma beal sámiid eatnatvuođage Nuppi Murmánskka guovllu sámi kongreassas juovlamánus 2010 Murmánskkas.

Govas vulobealde Valentina Sovkina (biktasiiguin maid ieš lea hábmen!) Sámi dásseárvokonferánssas Oslos 2007:  

foto-1snf1

ruossa-egi-smalll

Govas: Sámediggepresideanta Egil Olli deaivvada Sámedikkis  SUPS ovdaolbmuin Valentina Sovkina ja eará ruošša beale sámenissoniiguin skábmamánus 2009, dalle go SUPS (Murmánskka guovllu SámiRáđi) finai čilgemin ruošša beale sámiid demokratiijaovddidanbarggus. Govas gurut b. Nina Afanasjeva, dasto Egil Olli, Valentina Sovkina ja Elena Jakovleva.  Norgga sámediggepresideanta lei oassálastimin kongreassas Murmánskkas sotnabeaivve 12.12. Govven: SNF/Gába