SNF-Sámi NissonForum
SNF vuođđuduvvui fierbmádahkan 1993, ja miehtá-Sámi organisašuvdnan 1998.
Mis leat stivralahtut njealji riikkas: Ruoŧas, Norggas, Suomas ja Ruoššas. Jagis 2010 atnigođiimet iežamet maiddái njealji riikka sámenissoniid gealbu- ja resursaguovddážin.
SNF bargu lea eanaš doaimmahuvvon nuvttá ja astoáiggi bargun, mii lea gáržžidan min bargonávcca ja hehtten kontinuitehta. Nu eat leat bastán oažžut dan stáhtusa ja coavcci mii riikkaidgaskasaš sámi nissonorganisašuvnnas galggašii leat. Dan fas čujuheimmet juovlamánus 2010 – dalle lei 100 jagi dan rájes go vuosttas sámi nissonsearvi vuođđuduvvui norgga bealde. SNF oažžu doaibmadoarjaga Norgga Sámedikkis, man sturrodat maŋimus jagiid lea leamaš 150 000 nkr jahkái. SNF lea giitevaš dan stuorra lasiheapmái jagis 2011 – dán jagi ovdii lea nrk 300 000!
SNF álggaha ja čađaha prošeavttaid, buktá cealkámušaid, searvá iežamet gelbbolašvuođain iešguđet oktavuođaide ja oassálastá guovlolaš, našuvnnalaš ja riikkaidgaskasaš konferánssaide ja semináraide. Nu áimmahuššat ahte sámenissoniid jietna gullo. Máŋga jagi bargu dahká ahte SNF dovdá bures iešguđet guovlluid sámi nissonolbmuid kultur- ja árgabeai’eallima ja eallineavttuid.
SNF stivralahtut 2011 leat: May-Lisbeth Myrhaug, Oslo, Annele Gaup, Guovdageaidnu, Gudrun E E Lindi, Kárášjohka, Valentina Sovkina, Lujávri ja Rauna Kuokkanen, Ohcejohka, dál orru Torontos Kánadas. Várrelahtut leat Ellacarin Blind, Ubmi, Roza Jakovleva, Boazovárri ja Inga Ravna Eira, Kárášjohka.