SNF Jahkečoahkkin 2012 álgá bearjadaga čakčamánu 28.b. di. 18.30 (Suoma áiggi) ja nohká sotnabeaivve čakčamánu 30.b. di 13 beaiveborramiin. Doalut leat Sajos kulturguovddážis Anáris.  Sullii 30 sámi nissonolbmo njealji riikkas čoagganit. Doalut dulkojuvvojit dáid gielaide/gielain: Suoma-, ruošša-, davvisáme- ja dáro-/ruoŧagielas/-gillii.

Earret dábálaš jahkečoahkkináššiid de leat moattit sáhkavuorut guovtti sierra jahkečoahkkináššis:
1) Veahkaválddálašvuohta nissonolbmuid vuostá. Dan oktavuođas gullat dan easttadeaddji barggu dehálašvuođa, ovdamearkkaid dihtii báikegodde- ja kulturovdáneami áŋggirdeamis Sámis, mas olu báikkiin leat nissonolbmot guovddážis.

2) SNF Ruošša beale ossodaga plánejuvvon Murmánskka skábmakonferánssa birra – mii ovdanbuktá SNF máŋggajágáš prošeaktabargguid Guoládagas. Dán konferánssa áigumuššan lea dihkkádit luotta das mo joatkit nanosmahttit sámi nissoniid, mánáid ja bearrašiid dili ja sihkkaruššat báikkálaš birrasiid buori ovdáneami ja dohko buriid fálaldagaid, erenoamážit nuorra olbmuide ja nissonolbmuide.

Logaldallit dáin sierra jahkečoahkkináššiin leat Sámi Sostera Risten-Rávdná Magga, Ubmi unviersitehta dutki Márgge Uttjek, SNF Guoládaga ossodaga Anna Igontova, Alla Vasiljeva ja Valentina Sovkina, Lujávrris, Sámi Siidda prošeaktabargi Kati Eriksen Ohcejogas ja dasto kulturáŋggirdeaddji ja politihkár nuortalaš Tiina Sanila-Aikio.

Goalmmát ášši mas lea diehtojuohkin vuolgá das go sámedikkit leat dán jagi doallan ja boahtte jagi doallamin ráhkkaneaddji čoahkkimiid ovdal ON’ stuorra eamiálbmotmáilmmekonferánssa čakčamánus 2014:s. SNF atná dehálažžan diein oktavuođain sámenissoniid diliid čalmmustahttit, ja leat bovden Norgga Sámedikki ráđđelahttu Vibeke Larsen, das hállat. Dat Sámediggi han lágida Álttá-konferánssa.
Anáris lei oppasámi ráhkkaneaddji čoahkkin geassemánus 2012, ja geassemánus 2013 ges lágiduvvo eamiálbmotkonferánsa Álttás. Čujuhat Anára oppasámi čoahkkima cealkámuššii dás.
Bearjadat eahkeda geigejuvvo SNF ovddidanbálkkašupmi 2012. Dáinna bákkašum-iin SNF dáhttu rámidit ja gudnejahttit barggu dásseárvvu ja ovttaárvosašvuođa ovdii.

SNF jahkečoahkkináirasat besset velá oahpásmuvvat Sámi oahpahusguovddážii. Anáris. Dasto anárašgielat Koškepuško-nammasaš joavkku Anna Morottaja ja Maijukka Pyykko guoimmuheaba lávvardat eahkeda Kultahovi hoteallas.

-Illudat čoahkkinastit Suoma sámiid ođđa kulturgárdimis, Sajosis. Mii bargat čalmmustahttit ja nanosmahttit sámenissoniid sajádaga sámi birrasiin, oppa sámi servodagas ja davviriikkalaččat. Jahkečoahkkin gártá muhtun muddui “bargobádjin”, go mii ráhkkanit guovtti čoahkkimii maid SNF áigu lágidit; Murmánskka konferánsii ja SNF boahtte jagi jahkečoahkkinseminárii, maid plánet doallat Álttás dan stuorra ON-konferánssa oktavuođas. Dan semináras jearrat “Ii go Davviriikkaid demokratiija galgga maiddái sámenissoniid várás?”. Dan heive jearrat go boahtte jagi (2013) lea 100 jagi dassái go nissonolbmot Norggas jokse ollislaš jienastanvuoigatvuođa, ja sámenissoniid dilli lea ain nu ahte davviriikkalaš eiseválddit eai leat vel midjiide liigudan saji Davviriikkaid almmolaš dásseárvoovttasbarggus, cealká SNF stivra.

 

Govas: SNF jahkečoahkkimis Anáris gullat sámi mánáidkulturáŋggirdeamis sihke Guoládagas ja eará guovlluin Sámis. Govas Sámi mánáidteáhterfestivála Boazováris (Olenegorsk) Guoládagas 29.04.2012. Festivála dollo juohke jagi cuoŋománu maŋimus vahkkoloahpas. Govven: Gudrun E E Lindi