SNF lágida juovlamánu 1.-2.b. 2012 seminára “Jugešvuohta davvin: myhtat ja duohtavuohta”  Murmánskkas. Duogáš lea prošeakta “Eallit alkohola haga”, maid Ruošša beale sámenissonat ieža leat álggahan. SNF fuomášuhttá jugešvuođa, veahkaválddi ja nissondearvvasvuođa gaskavuođaid, ja dán duođalaš servodatváttisvuohtan, ja ávžžuha dasa ahte skábmamánu 25.b., ON riikkaidgaskasaš beaivi jávkadit veahkaválddi nissonolbmuid vuostá, šaddá dehálaš mearkabeaivin mii čalmmustahttojuvvo maiddái sámi servodagain.

SNF áigu juovlamánu 1.-2.b. 2012 lágidit seminára Murmánskkas prošeavttas “Eallit alkohola haga”. Ruošša beale sámenissonat leat ieža álggahan prošeavtta, ja SNF lea ohcan ovttasbarggu Davviriikkaid politihkalaš orgánaiguin ja iešguđet ásahusaiguin ja organisašuvnnaiguin, ee. Ruonáeatnama inuihttaálbmoga guovdu. Dál Davviriikkaid ministtarráđi struktuvra gieldá sámiid oassálastimis riikkaid ja našuvnnaid ásahuvvon ovttasbargui, mas Ruonáeatnan, Fearsullot ja Ålánda fal leat mielde. SNF atná ahte sámiid dás olgguštit lea heivetmeahttun Davviriikkaid demokráhtiijas! SNF lea jahkeviissaid cuiggodan mo dát ee. hehtte davviriikkaid eamiálbmotnissoniid lunddolaš ovttasbarggu.

SNF lea máŋga jagi čalmmustahttán jugešvuođa, veahkaválddi ja nissondearvvasvuođa gaskavuođaid ja dán duođalaš servodatváttisvuohtan, ja ahte inuihtaid ja sámiiid gaskasaš ovttasbargu dás eahpitkeahttá livččii ávkkálaš guktuid beliide. SNF rámida SamiSoster organisašuvnna Suoma bealde ja dan jođiheaddji Risten Rávnná Magga áŋggirdeami, mas sámegiela- ja báikkálaš kulturmáhttu leat leamaš dehálažžan joksat buriid bohtosiid. Dáid bargguid čuvgema dihtii ávžžuha SNF ahte skábmamánu 25.b., ON riikkaidgaskasaš beaivi vuosttaldit veahkaválddi nissonolbmuid vuostá, šaddá dehálaš mearkabeaivin maiddái sámi servodagain.

SNF lea giitevaš go Norgga Sámediggi ja Sámi parlamentáralaš ráđđi (SPR) geigii SNF:ii dán jagáš dásseárvobálkkašumi. Dalle SNF bargu fuomášuvvo, omd. ahte mii buktit beaivečuvgii tabuáššiid nu go seksuála givssideami, veahkaválddi ja jugešvuođa, ja ahte SNF unnit eanet lea áidna almmolaš jietnan cuiggodit sohkabealvealáheami.

Govva: SNF prošeakta- ja seminárvástideaddjit ruošša bealde: Gurut bealde Alla Vasiljeva, Valentina Sovkina ja Anna igontova. Alla ja anna leaba maiddái SNF stivrras miellahtut. Govven: Gudrun E E Lindi.