SNF jahkečoahkkin 2015 ávžžuha sámedikkiid farggamusat juolludit doarvái ruhtadoarjaga vai SNF sáhtášii cegget ovttasbargočállingotti uhcimusat ovtta ollesáiggevirggiin, njealji riikka sámenissoniid vástesaš bargguide.

Sámedikkiide Norggas, Suomas, Ruoŧas ja Ruoššas
SNF jahkečoahkkin 2015 ávžžuha sámedikkiid farggamusat juolludit doarvái ruhtadoarjaga vai SNF sáhtášii cegget ovttasbargočállingotti uhcimusat ovtta ollesáiggevirggiin, njealji riikka sámenissoniid vástesaš bargguide.
SNF lea dan rájes go ceggejuvvui organisašuvdnan, huksen viiddis fierbmádaga siviila sámeservodagas, almmolaš eiseválddiid ektui, ja maiddái organisašuvnnaiguin sihke iežamet guovllus, Árktisas ja máilmmeviidosaččat. Dan gealbbu ja máhttu maid SNF ovddasta ja maid 22 jagis leat čohkken bargguideamet ja vásáhusaideamet bokte ja fierbmádatduddjomis, ohcaluvvo dál sihke sámi servodagas ja majoritehtaservodagas.
SNF bargosuorggit gusket sámekultuvrii, -ealáhusaide ja –gielaide iešguđet Sámi guovlluin, main geahčadat erenoamážit sohkabeal- ja dásseárvobeliid, ja nissonolbmuid sosiála ja dearvvasvuođa dilálašvuođaid. SNF lea áidna oppa-Sámi organisašuvdna mii bargá dáiguin gažaldagaiguin. Sámenissoniin lea guovddáš sadji sámi kultur-, birgen- ja ealáhusárbevieruid hálddašeamis, seailluheamis ja ođasmahttimis, ja dán máhttu fievrrideames boahttevaš buolvvaide.
Muhto SNF:as ii leat veláge iežamet čállingoddi. Min bargu de eanaš dahkko eaktodáhtolaš bargun. Muhto SNF jahkečoahkkin ii ane dohkálažžan vuordit ahte SNF bargu joatká leahket nuvttábargun! Dálá dilis SNF organisašundoaimma vuođđun lea ovttaskasprošeavttaid ruhtadeamit ja Norgga Sámedikki jahkásaš organisašunruhta (2015:s 170 000 nru). Ná váilevaš resursaiguin lea veadjemeahttun cegget ovttage bargosaji.
SNF jahkečoahkkin bivdá danin sámedikkiid bovdet SNF ságaskuššamiidda bargguideamet birra ja mo organisašuvdnii galgá sihkkarastit dohkálaš bargodili. Njealji riikka eiseválddit berrešedje sihkkarastit SNF:ii ruđalaš resursaid vai SNF barggus lea joatkevašvuohta ja maiddái leat gulaskuddanorgánan, ja nu sihkkarastit ahte sámenissoniid jietna gullo. Dán atná SNF jahkečoahkkin erenoamáš dárbbašlažžan, das go SNF bargá riikkaidgaskasaččat ovddidit sáme- ja eamiálbmotnissoniid diliid.
Sámi Nisson Forum (SNF) jahkečoahkkincealkámuš nr. 2, Ubmeje, njukčamánu 7.-8.b. 2015.

SNF stivra:
Alexandra Artieva, Lujávri
Neeta Jääskö, Anár, dálOulu
Risten Lango, Šuoššjávri, dál Skarnes
Gudrun E E Lindi, Kárášjohka
Märgge Uttjek, Ubmeje