SNFa seminárafáttát: Mánáidkultuvra, Sámenissoniid doaibmaplána ja Bargu alkoholakeahtes eamiálbmotservodagaid ovdii. Roavvenjárggas 31.10.-02.11.08
SNF lágida seminára ”Sielu ráfi” ja jahkečoahkkima Roavvenjárggas.
Doalut leat Cumulus hoteallas Roavvenjárggas, ja álget golggotmánu 31.b. eahkedis ja bistet skábmamánu 2.beaivái. Seminára aigu loktet diliid mat leat atnon sámenissoniid ”privahta ja bearašbirrasa” dillin almmolašvuhtii – ja dá leat dilit mas menddo unnán ságastallo almmolaččat. Máŋggat áššit main nissonolbmot beroštit leat tabu, ja danne hárve oidnojit sámi servodatáššin. SNF háliida dán čalmmustahttit, ja bidjat ”priváhta” áššiid, maid illá duostá almmolaččat váldit ovdan, sámi servodaga almmolašvuhtii.Dát lea dan nammii vai nanosmahttit sámenissoniid rolla aktiivva servodatáŋggirdeaddjin, ja movttidahttit sámenissoniid beroštit váikkuhit servodatovdánahttima.
Semináras logaldallet: Petra Biret Magga Vuohčus eret, Risten Rauna Magga, Njunnásis eret, guktot Suomas, ja Larisa Abryutina, RAIPON – Ruošša davvi eamiálbmogiid lihttu.
Larisa Abryutina gullá čukči-álbmogii Sibirijas, ja lea doavttir ja RAIPON stivralahttu. Son áigu ovdanbuktit prošeavtta ”Oahppat eallit alkohola haga”. RAIPON lea 28 davvi-Ruošša eamiálbmotorganisašuvnnaid ovttastus, mas váldokantuvra lea Moskvas. Larisa áiggošii prošeavtta álggahuvvot Davvioarje-Ruošša eamiálbmogiid guovdo, ja lea álgovuorus gulaskuddagoahtán Guoládaga sámenissoniiguin áigumuša ovdanbuktit. SNF stivra de lážii sutnje saji SNF semináras čilget prošeavtta. SNF veadjá searvat ovttasbargoguoibmin prošektii. Ulbmilin lea dovddastit ahte alkoholisma lea davvi eamiálbmogiid váttisvuohtan, bargat alkoholakeahtes eallinbirrasa ovdii ja ovddidit dearvvaslaš eallinvuogi. Larisa čuovvu Sámekonferánssa 28.-30.10. SNF guossin.
SNF áigu digaštallat man diehtomielalaččat leat alkohola návddašeames almmolaš sámi ja eamiálbmot-deaivvademiin, ja eai go son sámi orgánat ja organisašuvnnat dás ságastala?
Petra Biret Magga lea sáhkavuorus gohčodan “Elles sámi mánáid kultuvra!”. Su sáhkavuorru lea Sámemánáid Kulturguovddáža prošeaktabarggu vásáhusaid vuođul, Suoma beal Sámis. Mo stohket ja ellet sámemánát dál ? Lea go prošeakta buktán bohtosiid servodahkii ja eandalit mánáide? Makkár niestti sámemánná dárbbaša boahtte áigái? Petra lea Suoma Sámi ravdaguovllus Vuohčus eret. Skuvlejupmi: Pedagogihka magistter/ Luohkáoahpaheaddji Lappi universitehtas. Son lea bargan oahpaheaddjin, ja 2004 čavčča rájes Sámedikki Sámemánáid Kulturguovddáža prošeaktajođiheaddjin. Unna Junná sámemánáid tv-prográmmajođiheaddji 2007 čavčča rájes. Muđui son lea juoigi, sámediggelahttu nuppi áigodagas, ja Vuohču Sámiid Searvvi várreságajođiheaddji.
Risten Rauna Magga orru Njunnásis ja lea Sami Soster Searvvi beaivválaš jođiheaddjin Anáris, Suomas. Son bargá sámiid giella- ja kulturvuoigatvuođaid ovdii, eandalit mánáid ektui ja sosiála- ja dearvvasvuođasuorggis. Son oaččui 2007 sámedikkiid (Sámi Parlamentáralaš Ráđi) dásseárvobálkkašumi, iežas barggu dihtii sámegiela ja sámi dearvvasvuodabálvalusaid ovdii Suomas ja barggustis ovddas gárrenmirkkogeavaheami vuostá. Son ge lea sámediggelahttu
Som čilge SNFa semináras iežas barggu birra ja manne lea dárbbašlaš ráhkadit doaibmaplána ovddidan dihte sámenissoniid dili. SamiSoster lea fállan searvat Suoma riikkasis bargui dán suorggis. Dáidá leat nu ahte njealji riikka sámenissonat ovttasráđiid ráhkadit dákkár plána?
Seminára leat ruhtadan Norgga Sámediggi ja Barentsčállingoddi, ja Sámiráđđi.
Jahkečoahkkin 2008 ja seminára “Sielu ráfi”, Roavvenjárggas 31.10.-02.11.08
Stivra bovde miellahtuid SNF jahkečoahkkimii 2008 Roavvenjárgii. Dollo velá seminára “Sielu ráfi: Dearvvasvuohta, Biras, Bajásšaddan”. SNF doalut álget bearjadat eahkeda golggotmánu 31.b. ja bistet sotnabeaivve skábmamánu 02. beaivái.
Árat seamma vahkus lágiduvvojit Sámi kulturvahkku ja Sameráđi konferánsa. Eahketprográmmas ee. Mari Boine ja Sara Margrethe Oskal. Dan birra logat dás: www.saamicouncil.net
Nuvttá oasseváldin. Jos dieđihat SNF jahkečoahkkimii ja seminárii čakčamánu 20.beaivái, de SNF gokčá belohahkii du mátkegoluid ja kulturvahko-/konferánssaoassálastima Roavvenjárggas. Bivdde eanet dieđuid dás, sádde e-poastta: snf@trollnet.no